O, Tannenbaum –
o, Tannenbaum…
Wie der Gruaba-Bauer an einem Weihnachtsfest gleich zwei
Christbäume hat
Von Harald Grill
Jetzt tauts scho wieder“, denk se da Hansi, wia r a vo da
Schulbushaltestell an Weg auffe zum Gruaba-Hof geht.
„Mist!“
Voller Wuat haut a mit da Faust de nassen Schneehäuberl
von am jeden Zaunpfosten oba. Des spritzt vielleicht, wann da scshwaare Schnee
aufn Bodn pflatscht…
„Und auf am solchern Schnee sollst na Schlitten fahren!
Mist elendiger! In drei Tag is Weihnachten. Und a Weihnachten ohne Schnee, des
ist des gleiche wia r a Kuahstall ohne
Kiah… Grad jetzt, wo de Weihnachtsferien ogengan…“, so grantelt der Hansi dahi,
bis a dahoam is.
Im Haus drin schmeißt a zerscht amal glei an Schulranzen
ins erstbeste Eck und Ziahgt seine Schuah aus, weils voller Baaz san.
Da Papa und d Mama hockan scho beim Essen.
A Nudelsuppn gibts …
„o mei, omei, scho wieder a Nudelsuppn“, denkt se da
Hansi.
Aber er sagt nix. Taat eh nix helfa. Und gegan Hunger
taugt sogar a Nudelsuppn…
Da Papa is scheinbar aa net so bsonders guat aufglegt.
„…jeds Joahr teuerna, da mach i nimmer mit…“, hat da
Hansi beim Einergeh verstanden. D Mama
fragt n heut gar net, wia s eahm in da Schul ganga is. Bloß mim Papa redts:
„Naa, do mach i net mit! A Weihnachtn ohne Christbaam, des is für mi koa
Weihnachtn!“
„Glaubst, das i so an Hauffa Geld für so an lumpertn Baam
zahl. De wissen doch scho nimmer, was s no verlanga solln“, gibt ihr da Papa
zur Antwort. Aber d Mama gibt aa net nach: „ Weihnachtn is Weihnachtn! Wird ja
doch eh alles teurer – warum soll ma denn ausgerechnet beim Christbaum zum
Sparen ofanga, ha!?“
„Christbaam brächert ma scho oan“, rutscht am Hansi außa,
und a poar Nudeln rutschn nach auf d Tischdeckn hi. „Paß halt besser auf, Menschenskinder!“,
schimpft d Mama glei.
Typisch. Allerweil wenn ses neet einig san, dann geht’s
an eahm aus. Aber er sagt heut nix. Irgendwie is a ganz ohne Kraft, ganz
lätschert; hat eh alles koan Sinn, koa Schnee, koa schlittenfahren.
Staad löffelns weiter.
D Mama sagt nix mehr.
Da Hansi sagt nix mehr.
Da Papa sagt nix mehr.
Aber am Papa is net recht guat. Irgendwie hat a se net
durchsetzten kinna mit seiner Idee. Koa Christbaam. Naja, des hat a bestimmt
blos so gsagt, weil a eahm gstunga hat.Weil a Christbaam einfach net so vül
wert is, der steht doch eh grad 14 Tag.
Da Hansi kann se do scho a bißl in sein Papa eineversetzten.
Aufaramal hat a r an Einfall: „Papa, Mama!“ und d Nudeln
falln eahm vom Löffel wieder auf d Tischdeckn!
„Hansi!“
schreit d Mama.
„i hab a Idee“, mia holn uns einfaxh ausm Wald an
Christbaam!“
Aber des paßt da Mama überhaupt net: „Schmarrn! Gstohln
wird net; mia hamma no nia was stehln miaßn!“
An des hat da Hansi non et denkt ghabt, daß der Wald ja
irgendwem ghört, und daß ma da net einfach an Baam mitnehma derf…
Aber da Papa hilft eahm: „So bläd waar des gar net! Da
hats do jetz an Hauffa Baam umghaut bei dem schwaarn, nassn Schnee, trümmer
Baam, i habs gestern erscht gsehng,
wiari vo Regschburg hoamgfahrn bin!“
„Willst leicht an zeha Meter hochn Baam ins Zimmer
einalegn, ha?“
...
Keine Kommentare:
Kommentar veröffentlichen