...
D Mama is ganz entsetzt. Sie woaß scheinbar net, ob da
Papa bloß an Flax macht oder ob a echt wieder oane vo seine gspinnertn Ideen im
Kopf hat. Aber da Papa is gar ned so bläd, wia se des zerscht oghört hot: „An
Gipfl, Maare, an Gipfl, was moanst denn du, de Gipfln vo solcherne umgstürztn
Baam, des waarn de schönsten Christbaam, des sag da i!“
Da Hansi is glei bei der Sach: „Mensch ja, da geh i aa
mit!“ Am Papa is des wurscht „Vo mir aus“,
sagt a grad. Und d Mama sagt nix mehr, weil des siehgts aa ei, daß des erlaubt
sei muaß, wenn ma grad an Gipfl von am Baam nimmt, der wo eh scho obbrocha is. Am nächsten Tag geht da Hansi mim Papa los…
Aber erscht spät an Nachmittag. Do wird’s scho a bißerl dunkel – ganz trauns der Sach doch non et.
„I woaß ja net genau, ob ma des überhaupt derf. Hernach sieht uns oana…. Und des mua´ja dennerst net glei sei, oder?“, moant da Papa.
Dann ziahgt a sein dickn Anorak o. Net eppa, weil a Angst hat vor da Kältn – naa- aber wo soll a denn s Hackl verstecka!? An Stiel hat er unter da rechten Achsel eizwickt, und d Klinga, de halt a mit da rechtn Haund vo außn durch d Taschn… Vom Hackl siehgt koa Mensch nix. Bloß as Gangwerk vom Papa is komisch.
Wia wenns eahm im Kreuz fehln taat, oder wia wenn a unbedingt aufs Klo miaßat…
Auf da Teerstraß sans no recht zuversichtlich, alle zwoa.
Da redns mitanander, wia da Christbaam ausschaung soll, wia hoch, wia broad, und wia grad…
Im Wald drinn werdns schee langsam staader und staader.
Ab un zua machan sese gegenseitig a bißerl an Muat. Da Papa sagt: „Nur zua, Hansi, etz werdn ma glei oan haben, schau hi, da vorn, da liegt scho so a umgestürzter Baam!“
Da Hansi sagt: „Baam gibt’s grad gnua, i glaub, den Christbaam hamma scho so guat wie in da Taschn!“
Im Wald drin liegt no überall da Schnee. An manche Stelln geht a r am Hansi bis zu de Knia.
A jeder Tatscher, den wo s machan, der is wia wenns`s in a Dreeglacka einisteign taatn.
A jede Tritt is a Loch im Schnee.
In am jedn Loch laafft sofort as Wasser zamm, wenn ma r an Fuaß wieder außaziahgt. A jeder Trittling is sofort a kloana See. Und de Schuah vom Papa, und de Schuah vom Hansi, de san durch und durch naß: so naß wiara Schifferl, wo außn net mit Teer gstricha is, a Schifferl, wo s Wasser hint und vorn, obn und unt durchs morsche Holz einedruckt…
De zwoa schwimman scho glei in eahnane Schuah drin.
„Taucherflossen bräuchert ma“, flaxt da Hansi.
Der Papa ist nimmer aufglegt zum Scherzn. „Red koan
Schmarrn“, sagt a. Jetzt sehngs scho fast nix mehr. Stockfinster wird’s. Da wenn da Papa koa Taschnlampn dabei hatt! Bloß guat, daß ar an Hansi net oleicht, daß a allerweil grad in Wald eineleicht…
Da Bodn unterm Schnee is nämlich net gfrorn. Jeder Schritt ziahgt mit de Schuah d Lettn außa. Je schneller daß gengan, desto höher hauts an Dreeg hint auße.
Und geh taans allerweil schneller, weils scho Angst ham, daß koan gscheidn Baam mehr finden in da Finstern. Und weil der Hansi hinterm Papa geht, hat a an Baaz scho bis im Gsicht drin.
Da Papa is halt koa Bulldog, weil a Bulldog wenn a waar, dann hätt a an Kotflügel, der taat wenigstens a bißerl an Dreck auffanga…
Quer druchn Wald haatschns. Patschnaß sans. Auf und auf voller Dreck sans.
Und wia s an umgstürztn Baam sehng im Liacht vo da Taschnlampn, dann fangangs as Renna o …. Plaatsch…. Pfaaatsch…. Plaaatsch, pflaatsch, plaaatsch, pflaatsch…
Am Papa is scho aa koa Baam recht!!!
Er ist da Fachmann; allerweil wieder findet a was zum Aussetzn. „Schau doch hi, der hat a krumme Spitzn, und der, der is z kurz und der is z lang, und der is z broad, und der is z dürr, dem fehln obn alle Astln, der ist oagseitert, der liegt z tiaf im Dreck drin…“
„Also naa, Papa, etz glangts schee langsam, i mag nimmer“, sagt da Hansi. Allerweil wieder sagt a s…
Und da Papa stellt schee staad allerweil wenger Ansprüch. Allerweil wenger hat er zum Aussetzn an de Baam. Und auf aramal kriagt a sei Wuat. Aufaramal is eahm alles wurscht.
.... beim nächsten Mal wenn ich an der Reihe bin, gibt's den Schluss der Geschichte für euch. ;)
Keine Kommentare:
Kommentar veröffentlichen